Pas katër vitesh të rëndësishme në klubin tonë, Erald Maksuti mbyll një etapë të veçantë të karrierës si pjesë e FK Apolonia. Sulmuesi i majtë, i lindur më 10 maj 2004, i bashkohet zyrtarisht Flamurtarit, duke marrë me vete një trashëgimi të ndërtuar me përkushtim, punë dhe shpirt gare.

Maksuti ishte një nga lojtarët më të dalluar në sezonin e kaluar në Kategorinë e Parë, ku zhvilloi 23 ndeshje dhe realizoi 12 gola, duke dhënë një kontribut të jashtëzakonshëm në sulmin bardhejeshil. Brenda katër sezoneve në Fier, ai u formua jo vetëm si futbollist, por edhe si figurë e respektuar në fushë dhe jashtë saj.

Në mesazhin e tij lamtumirës, Eraldi ndau fjalë prekëse për eksperiencën e tij në Fier, duke e përshkruar Apoloninë si një familje, një vend ku u rrit dhe mësoi çfarë do të thotë të përfaqësosh më shumë se veten.